НАТО следната недела ќе ја почне најголемата вежба од крајот на Студената војна, при што ќе се тестира како американските трупи би можеле да ги засилат своите европски сојузници на источното крило на западната алијанса, од кои некои граничат со Русија, во случај на голем конфликт. Околу 90.000 војници ќе се придружат на вежбата „Непоколеблив бранител 2024“, што ќе трае до мај, објави главниот воен заповедник на алијансата Крис Каволи.
Во вежбата ќе учествуваат над 50 бродови, вклучувајќи носачи на авиони и разурнувачи, над 80 борбени авиони, хеликоптери и дронови и најмалку 1.100 оклопни возила, од кои над 130 тенкови.
„На вежбата ќе се тестира исполнувањето на регионалните планови на НАТО, кои се први одбранбени планови што алијансата ги направи во последните децении“, вели Каволи.
Во најавата на НАТО не се спомнува Русија, но таа претходно беше означена како најзначајната и најдиректна закана по безбедноста на членките на НАТО.
Последната вежба со вакви размери беше одржана во 1988 година, со учество на 125.000 војници.
Членките на алијансата ги потпишаа регионалните планови на ланскиот самит во Вилнус, со што заврши долга ера во која НАТО немаше потреба од големи одбранбени планови.
