Победникот на вчерашните парламентарни избори во Шведска тешко може да се прогласи откако по 95% пребројани гласови партиите на левиот центар имаат благо водство во однос на владејачкиот десничарски блок. Победата на опозицијата би го запрела свртувањето кон десницата во изминатите четири години, што ја трансформираше Шведска од една од европските земји кои најдобро ги прифаќаат имигрантите во држава со еден од најстрогите режими за азил.

Се проценува дека Социјалдемократите на можната идна премиерка Магдалена Андерсон на крајот ќе имаат само три пратенички места повеќе од ривалската коалиција од четири партии предводена од конзервативниот премиер Улф Кристерсон. Тој во владата е поддржан од крајнодесничарската партија со неонацистички корени Шведски демократи и ѝ вети министерски места доколку остане на власт.

Кристерсон утрово изјави дека сè уште не е јасно кој ќе ја формира следната влада.

„Гласачите го кажаа своето, но сè уште немаме конечен резултат. Која влада ќе ја предводи Шведска во наредните години, сè уште е отворено прашање“, им рече тој на поддржувачите.

Ниту еден од големите медиуми сè уште не прогласил победник.

Броењето гласови ќе продолжи и во следните денови, пред конечните резултати да покажат која страна има појасен пат до мнозинство. Според моменталните резултати, партиите на левиот центар имаат водство од околу 20.000 гласови.