Владејачкaта популистичка партија во Србија Српска напредна странка (СНС) предложи актуелниот претседател Александар Вучиќ да стане премиер ако победи на предвремените парламентарни избори. Главниот одбор на СНС едногласно одлучи Вучиќ да биде носител на изборната листа наречена „Александар Вучиќ – Обединета Србија“ на претстојните предвремени парламентарни избори.

Лидерот на СНС, Милош Вучевиќ, ја соопшти оваа одлука на партиската седница одржана во Ниш, нагласувајќи дека Вучиќ ќе биде централна фигура на изборната трка. Самиот Вучиќ во гостување на телевизијата ТВ Информер изјави дека изборите ќе ги распише најдоцна на 9 или 10 септември, додека како можни датуми за гласање се споменуваат 18 и 25 октомври. Ако ја добие довербата, Александар Вучиќ најави дека неговиот кабинет би броел најмногу 12 министри, најмала влада во историјата на земјата.

Гласањето ќе се одржи речиси две години откако се урна настрешницата на железничката станица во Нови Сад, при што загинаа 16 лица, предизвикувајќи демонстрации предводени од млади луѓе кои ја обвинија корупцијата и некомпетентноста на владата за трагедијата. Изборите ќе се одржат во атмосфера на зголемени политички тензии, бидејќи популистите се обидуваат да ја задржат власта и покрај распространетото незадоволство на граѓаните.

Десетици антивладини демонстранти денеска маршираа во градот Ниш, додека партијата на Вучиќ го одржуваше својот состанок таму. Полицијата ја опколи зградата на Националниот театар за да ги спречи демонстрантите да стигнат до местото на состанокот.