Пет држави од Европска Унија го повикаа Брисел да одржи итен состанок на кој би се разговарало за обезбедување поправична дистрибуција на вакцините против ковид-19.
Лидерите на Австрија, Бугарија, Летонија, Словенија и Чешка испратија заедничко писмо во кое истакнаа дека сегашниот систем ќе продолжи да создава огромни разлики помеѓу земјите-членки до летото, при што некои ќе успеат да постигнат колективен имунитет, а други многу ќе заостанат. Писмото е испратено до претседателите на Европската комисија и Европскиот совет, Урсула фон дер Лајен и Шарл Мишел, од кои се бара што поскоро да отворат разговори на оваа важна тема.
„Дозите не се распределуваат пропорционално помеѓу земјите-членки и се постигнуваат дополнителни договори за снабдување како резултат на нетранспарентното преговарање“, изјави австрискиот канцелар Себастијан Курц.
Според него, Холандија и Данска обезбедиле значително поголемо количество вакцини од земји како Бугарија и Хрватска.
