Левичарската коалиција Нов народен фронт (НПФ) ќе има најмногу пратеници во новиот состав на францускиот парламент, кажуваат првичните резултати на излезните анкети на Ипсос и Ипоф по денешниот втор круг на парламентарните избори, на кои што се предвидуваше голема победа на крајната десница.

Според нив, НПФ ќе има меѓу 175 и 205 пратеници, додека на второто место е алијансата Заедно на Емануел Макрон, на која ѝ се предвидуваат меѓу 150 и 175 мандати.

Националниот собир (РН) на Марин Ле Пен и Жордан Бардела е на третото место во излезните анкети, иако крајната десница очекуваше историска победа и за првпат да биде во можност да формира влада и да има контрола во Националното собрание. Место мнозинството од 289 пратеници, анкетите велат дека РН ќе има меѓу 115 и 150 пратеници.

Излезноста во вториот круг беше околу 60% во 17 часот, значително повеќе во однос на изборите пред две години, кога беше 38%. Ова исто така е најголемата излезност на парламентарните избори во Франција во последните 40-ина години.