Американскиот претседател Доналд Трамп изјави дека разговорите во Каиро меѓу посредниците и лидерите на Хамас вчера довеле до договор за постепено разоружување во Газа, но претставник на Хамас го нарече договорот нацрт, а американски претставници рекоа дека Израел е скептичен оти палестинската милитантна група ќе го предаде своето оружје.

„Денес, Одборот за мир постигна ИСТОРИСКИ договор за ЦЕЛОСНО РАЗОРУЖУВАЊЕ на Хамас и сите други вооружени групи во Газа“, напиша Трамп на социјалните мрежи, додавајќи дека разоружувањето ќе се спроведува во фази. „Ова е монументален чекор кон траен МИР и БЕЗБЕДНОСТ.“

Според Трамп, договорот е клучен чекор кон тоа Газа да биде управувана од нова палестинска влада која тесно ќе соработува со таканаречениот Одбор за мир. „Во исто време, Израел ќе ја има безбедноста што ја заслужува, а Газа повеќе нема да се користи како база за терористички напади“, додаде тој.

Израелската амбасада во Вашингтон не одговори веднаш на барањето за коментар во врска со најавата на Трамп.

Извор од Хамас за Ројтерс изјави дека „нацрт-договорот“ предвидува тешкото оружје да биде складирано и ставено под контрола на палестинска администрација, при што оружјето нема да биде предадено на Израел.

„Нема да преземеме никакви чекори во врска со разоружувањето пред Израел да се повлече од Појасот Газа“, изјави Гази Хамад, член на преговарачкиот тим на Хамас, за Ал Џезира.

Американски претставник вчера изјави дека Израел е „многу скептичен дека Хамас ќе се разоружа“.

„Многу сме уверени дека ќе се придржуваат до договорот“, додаде американскиот претставник. „Ако не го сторат тоа, очигледно претседателот Трамп ќе биде многу, многу разочаран.“

Се поставија и прашања околу тоа колку долго ќе трае процесот. Претставник на Одборот за мир процени дека ќе бидат потребни меѓу 200 и 320 дена, но американски претставник го минимизираше значењето на таа временска рамка.

Израелски претставник, кој сакаше да остане анонимен, изјави дека Израел уште пред објавата на Трамп го отфрлил предлогот.

„Израел бара целосно разоружување на Хамас, вклучително и отстранување на оружјето од Газа и целосна демилитаризација на Појасот како предуслов за каков било процес“, рече претставникот. „Документот од 15 точки за кој станува збор не нуди задоволителен одговор на овие барања и Израел ги пренесе своите приговори.“

Претходно, според медицински извори, израелски напади убиле најмалку шест Палестинци во Газа, меѓу кои и две деца.

Лидерите на Хамас одржаа разговори со посредници од Египет, Катар и Турција за втората фаза од планот на Трамп за Газа, како што им бил претставен од неговиот Одбор за мир.

Трамп го формираше Одборот за мир за да го надгледува планот за завршување на војната меѓу Израел и Газа и за обнова на разурнатата територија. Тој ги назначи членовите на одборот, со себе како претседавач, и минатата година изјави дека одборот ќе ја надгледува привремената управа на Газа.

„Пред нас е обновена Газа, управувана од Палестинци и во мир со Израел, со политичка перспектива за значајно решение на израелско-палестинскиот конфликт“, изјави Николај Младенов, пратеник на Одборот за мир на Трамп за Газа, во соопштение објавено по објавата на претседателот.