Реџеп Таип Ердоган го обвини западот за варварство и за толерирање на исламофобија во говорот што го одржа во пресрет на 75-годишнината од усвојувањето на Универзалната декларација за човековите права.
„Израел изврши злосторства и масакри кои се срам за целото човештво. Во Газа се убиваат сите вредности на човештвото. Соочени со ваквата бруталност, меѓународните институции и организациите за човекови права не преземаат никакви конкретни чекори за да се спречат ваквите прекршувања“, кажа Ердоган.
Алудирајќи на ветото што САД го ставија на резолуцијата на Обединетите нации со која се бараше хуманитарно примирје во Газа, Ердоган порача дека праведен свет не е можен со Америка, зашто САД се на страната на Израел.
„Отсега, светот веќе нема да верува дека САД ја поддржуваат Универзалната декларација за човековите права“, рече Ердоган и додаде дека единствената вредност до која се придржува западот е неговото варварство.
„Ги видовме примерите на тоа варварство на западот во сите овие несреќни настани, што ги поддржуваше или беше учесник“, додаде турскиот лидер.
