Проруските сепаратистички лидери во источна Украина денеска наредија целосна воена мобилизација, среде напливот на насилство во регионот разурнат од војна и стравувањата на Западот дека Русија би можела да го искористи судирот како изговор за инвазија. Денис Пушилин, шефот на проруската сепаратистичка влада во украинската област Доњецк, објави изјава во која најави целосна мобилизација на војската и ги повика резервистите да дојдат во воените канцеларии. Слична изјава брзо следеше од Леонид Пашечник, сепаратистички водач во регионот Луганск.

Пушилин рече дека има „непосредна закана од агресија“ од украинските сили, обвинувања што украинските власти претходно жестоко ги негираа.

Сепаратистите и украинските сили се борат речиси осум години. Но, насилството долж линијата на контакт што ги дели двете страни, меѓу кои и бомбашкиот напад со автомобил во источниот град Доњецк и гранатирање хуманитарен конвој, се зголеми во последните денови. Со околу 150.000 руски војници распоредени околу границите на Украина, долготрајниот сепаратистички конфликт може да даде искра за поширок напад.

Вчера, бунтовниците почнаа да ги евакуираат цивилите од зоната на конфликтот со најава што изгледа дека е дел од нивните и обидите на Москва да ја претстават Украина како агресор.

Во злокобна проценка, американскиот претседател Џо Бајден рече дека сега е убеден оти рускиот претседател Владимир Путин одлучил да ја нападне Украина и да го нападне главниот град Киев. Бајден, кој со недели велеше дека САД не се сигурни дали Путин ја донел конечната одлука, рече дека неговата проценка се променила, повикувајќи се на американското разузнавање.

„Од овој момент, убеден сум дека тој ја донесе одлуката“, рече Бајден. „Имаме причина да веруваме во тоа“. Тој повтори дека нападот може да се случи во наредните денови.

Во меѓувреме, Кремљ објави дека денеска ќе спроведе масовни нуклеарни вежби, а Путин вети дека ќе ги заштити националните интереси на Русија од она што го смета за закани од Западот.