Владимир Путин ќе ја признае независноста на самопрогласените народни републики Доњецк и Луганск, области во источна Украина кои се под контрола на проруските сепаратисти од 2014 година. Ова денеска од него го побараа лидерите на двата региона, Денис Пушилин и Леонид Пасечник, а пред една недела и рускиот парламент.

Во соопштението на Кремљ се вели дека Путин им рекол на лидерите на Германија и Франција дека има намера да потпише декларација за признавање на областите Доњецк и Луганск како независни држави.

„Во блиска иднина, Путин планира да потпише извршна наредба“, кажа Кремљ.

Оттаму додаваат дека Емануел Макрон и Олаф Шолц изразиле разочарување од таквиот развој на ситуацијата, но навестиле дека се подготвени да ги продолжат контактите.