Рускиот претседател Владимир Путин денеска изјави дека Русија стана првата земја во светот со регулаторно одобрување на вакцината против ковид-19, по помалку од два месеци тестирање врз луѓе, потег кој Москва го поздрави како доказ за нејзината научна моќ. Развојот го отвора патот за масовна имунизација на руското население, дури иако продолжува последната фаза на клиничките испитувања за тестирање на безбедноста и ефикасноста.
Брзината со која Русија се обидува да ја пушти својата вакцина ја нагласува нејзината решеност да победи во глобалната трка за ефикасен производ, но предизвика загриженост дека го става националниот престиж пред науката и безбедноста.
Говорејќи на владата седница на државната телевизија, Путин рече дека вакцината, изработена од московскиот институт Гамалеја, е безбедна и дека дури ѝ била дадена на една од неговите ќерки.
„Знам дека е доста ефикасна, создава силен имунитет и повторувам, ги помина сите потребни проверки“, рече Путин.
Тој рече дека се надева оти земјата наскоро ќе започне со масовно производство на вакцината.
Одобрување од Министерството за здравство предвидува почеток на поголемо тестирање во кое учествуваат илјадници учесници, попозната како трета тест фаза. Ваквите испитувања, за кои е потребна одредена стапка на учесници да се заразени со вирусот за да се набљудува ефектот на вакцината, вообичаено се сметаат за основни предуслови за вакцината да добие регулаторно одобрение.
Регулаторите ширум светот инсистираа на тоа дека брзањето кон развој на вакцините против ковид-19 нема да ја загрози безбедноста. Но, неодамнешните истражувања покажуваат зголемена недоверба на јавноста во напорите на владите за брзо производство на ваква вакцина.
На руските здравствени работници кои лекуваат пациенти со ковид-19 ќе им биде понудена можност доброволно да се вакцинираат веднаш по одобрувањето на вакцината, изјави извор за Ројтерс минатиот месец.
Над 100 можни вакцини се развиваат низ целиот свет во обидот да се запре пандемијата. Најмалку четири се во завршна фаза на испитувања врз луѓе во трета фаза, според податоците на СЗО.
