Дрвото што Доналд Трамп и Емануел Макрон заеднички го посадија во дворот на Белата куќа како симбол на силните врски помеѓу двете земји се исушило, објавија повеќе француски медиуми.
Макрон му ја подарил садницата даб на Трамп при неговата ланска посета на САД, кога напиша на Твитер:
„Пред 100 години, американските војници се бореа во Франција за да ја одбранат нашата слобода. Ова дрво, кое е мој подарок за Доналд Трамп, ќе биде потсетник на тие наши врски“.
Весникот „Монд“ прв објави дека дрвото се исушило, повикувајќи се на дипломатски извори, што потоа беше потврдено и од „Фигаро“.
Садницата беше донесена од шумата Бејо, североисточно од Париз, кадешто 1.811 Американци загинале во жестоките борби на крајот на Првата светска војна. По само неколку дена, дрвото исчезна од дворот, со појаснување дека е преселено во карантин, но таму се исушило.
