Италијанските центри за мигранти во Албанија сега се подготвени за работа, изјави во петокот италијанскиот амбасадор во Тирана, по неколкумесечни одложувања и логистички пречки.
Според договорот од 2023, Тирана се согласи Италија да испраќа до 36.000 машки мигранти секоја година во два центри за азил во северна Албанија.
Италијанските групи за човекови права и опозициските политичари го нарекоа договорот „дехуманизирачки“ и „незаконски“, предупредувајќи дека пренасочувањето на мигрантите во центри кои се приватно управувани ќе го ослабне надзорот над условите и ќе го зголеми прекршувањето на основните права.
Федерика Борлици, адвокатка на CILD, италијанската коалиција за слобода и граѓански права, ги нарече центрите „италијански Гвантанамо“, споредувајќи ги со озлогласениот американски притворен логор во Куба, во кој осомничените за тероризам беа затворани без судење и мачени.
Откако дојде на власт на антиимиграциска платформа во 2022, италијанската премиерка Џорџа Мелони ги предводи договорите на Европската унија со африканските земји за блокирање на заминувањето на бродовите со мигранти и воведе строги правила за оние кои пристигнуваат во Италија илегално.
Рим вели дека договорот има за цел да го намали притисокот врз италијанските центри и да ги одврати мигрантите од заминување. Мелони го нарече договорот „нов и храбар пат без преседан“, кој може да се повтори и со други земји кои не се членки на ЕУ. Петнаесет други земји на ЕУ ѝ пишаа на Европската комисија за да побараат да ги разгледа можните модели за слични шеми.
Според новата шема, на мигрантите испратени во Албанија барањата за азил ќе им бидат брзо разгледани и ќе бидат депортирани доколку не бидат успешни. Амбасадорот не кажа кога очекува да пристигнат првите мигранти.
