Седум големи аеродроми во Германија се во застој откако стотици вработени стапија во штрајк поради спорот за плати. Откажани се повеќе од 2.300 летови на аеродромите во Франкфурт, Минхен, Штутгарт, Бремен, Хамбург, Хановер и Дортмунд, што погоди 300.000 патници.

Синдикатот Верди и Здружението за цивилна служба бараат покачување на платите на работниците за 10,5%.

Од аеродромот во Лајпциг утрово полетаа неколку меѓународни авиони, но се откажани сите домашни.

Штрајкот се совпадна со почетокот на Безбедносната конференција во Минхен, на која доаѓаат светски лидери и одбранбени експерти, па многумина делегати беа посоветувани да дојдат со воз.

Претставниците на здруженијата на мали и средни бизниси го осудија штрајкот како неприфатлив и ги обвинија синдикатите дека целата држава ја држат во заложништво за свои интереси. Барањата на работниците на аеродромите досега беа одбиени.

„Следните штрајкови ќе имаат поинаква димензија. Ако работодавците не ни дадат добра понуда следната недела, ова ќе биде само почеток“, изјави лидерот на Верди, Франк Вернеке.