Европските нации, Кина и други држави брзаат да евакуираат илјадници свои граѓани од главниот град на Судан, Картум, за време на привремено затишје во жестоките борби помеѓу регуларната војска и паравоените Сили за брза поддршка (РСФ). Насилствата ненадејно избија на 15 април и досега загинале над 400 луѓе, додека САД предупредија дека се јавува недостиг на лекови, храна и вода.

По САД, и Велика Британија вчера ги евакуираше своите дипломати од Судан, а Франција и Германија кажаа дека извлекле вкупно 700 луѓе, без да ја наведат нивната националност. Неколку држави испратија воени авиони од Џибути за да помогнат во евакуациите, а други слични операции се одвиваат преку Порт Судан на брегот на Црвеното Море, оддалечен 800 километри од Картум.

Кина, Либан, Индонезија, Данска, Холандија, Швајцарија, Шведска и Србија се меѓу земјите кои објавија дека евакуирале свои државјани од Судан, додека ваква мисија подготвува и Јапонија.

Од почетокот на борбите за превласт, борбени авиони го бомбардираа Картум, а артилерискиот оган го направи движењето низ градот небезбедно. Цел на нападите беа и дипломатски претставништва, а загинале најмалку петмина хуманитарни работници. Двете завојувани страни не го почитуваа привременото примирје.

Армијата и РСФ заеднички извршија пуч во 2021, но потоа не успеаја да постигнат договор за интегрирањето на двете групи и за формирањето на цивилна влада.