Претседателот на САД Доналд Трамп рече дека украинскиот претседател Володимир Зеленски може да ја заврши војната со Русија „ако сака“, но ја исклучува можноста Украина да се приклучи на НАТО како дел од мировниот договор. Трамп рече и дека Украина нема да може да го врати Кримскиот Полуостров, нелегално анектиран од Москва во 2014 година.
„Претседателот Зеленски од Украина може да ја заврши војната со Русија речиси веднаш, ако сака, или може да продолжи да се бори“, напиша Трамп на својата социјална мрежа Трут соушал. „Се сеќавате како започна. Нема враќање на Крим даден од Обама (пред 12 години, без ниту еден истрел!), и НЕМА ВЛЕГУВАЊЕ ВО НАТО ОД УКРАИНА. Некои работи никогаш не се менуваат!!!“, додаде тој.
Денеска украинскиот претседател доаѓа во САД за разговори во Белата куќа за иднината на Украина, во придружба на неколку клучни лидери на ЕУ.
Специјалниот претставник на Трамп вели дека Владимир Путин се согласил на „робусни“ безбедносни гаранции за Украина – вклучително и потенцијален одбранбен аранжман во стилот на НАТО.
Зеленски го повтори својот повик за безбедносни гаранции, откако претходно ја поздрави „историската одлука“ на САД да го сторат тоа во случај на мировен договор со Русија.
„Важно е Америка да се согласи да соработува со Европа за да обезбеди безбедносни гаранции за Украина, а со тоа и за цела Европа“, рече Зеленски на Икс.
Германскиот канцелар Фридрих Мерц, британскиот премиер Кир Стармер и францускиот претседател Емануел Макрон ќе бидат меѓу европските државници кои ќе го придружуваат Володимир Зеленски на неговата утрешна средба со Доналд Трамп во Белата куќа. Покрај нив, во европската делегација ќе бидат и италијанската премиерка Џорџа Мелони, претседателката на Европската комисија Урсула фон дер Лајен, финскиот претседател Александер Стуб и шефот на НАТО, Марк Руте.
Европските политички функционери беа изоставени од самитот на Трамп со рускиот претседател Владимир Путин на 15 август, и тие се стремат да ја заштитат Украина и континентот од каква било зголемена агресија од Москва. Со доаѓањето како група, тие се надеваат дека ќе избегнат какви било дебакли како состанокот на Зеленски во февруари во Овалната соба, каде што Трамп го прекори за тоа што не покажа доволно благодарност за американската воена помош. Средбата е исто така тест за односот на Америка со нејзините најблиски сојузници откако Европската Унија и Обединетото Кралство ги прифатија зголемувањата на царините на Трамп делумно затоа што сакаа негова поддршка за Украина.
Портпаролот на кинеското Министерство за надворешни работи денеска изјави дека очекува сите засегнати страни во украинската криза да учествуваат во мировните преговори со цел обезбедување траен договор прифатен од сите страни. Портпаролот на Министерството Мао Нинг, изјави дека Пекинг ги поддржува сите напори за мирно решавање на украинската криза.
