Русија е спремна за еднаков дијалог, дијалог со заемно почитување, кажа Кремљ, откако Доналд Трамп вчера ѝ се закани на Москва со царини, даноци и санкции ако не ја заврши војната во Украина.

„Чекаме сигнали кои се уште не се дојдени“, изјави портпаролот на Кремљ, Дмитри Песков.

Тој додаде дека Русија не гледа ништо ново во заканите на Трамп.

„Тој сака такви методи, барем ги сакаше во својот прв претседателски мандат“, рече Песков.

Брзо запирање на војната во Украина беше едно од најисчекуваните предизборни ветувања на Трамп, за потоа да каже дека за мировен договор ќе треба време.

„Тоа не е само прашање за завршување на војната. Прво и најважно е решавање на основните причини за украинската криза. Значи, мораме да видиме што значи договор за претседателот Трамп. Тој не е одговорен за она што САД го прават во Украина од 2014, правејќи ја антируска, но тој сега има моќ да ја запре оваа злонамерна политика“, изјави заменик-амбасадорот на Русија во Обединетите нации, Дмитри Пољански.