Тројца научници кои го открија вирусот хепатит Ц ја поделија годинашната Нобелова награда за медицина. Таа ќе им припадне на британскиот научник Мајкл Хаутон и Американците Харви Алтер и Чарлс Рајс.

Хепатит Ц многу често е тивка инфекција, која годишно погодува 70 милиони и убива 400.000 луѓе. Вирусот е честа причина за рак на црниот дроб и главна причина зошто на луѓето им треба пресадување.

Нобеловиот комитет ја опиша нивната работа како историско постигнување и додаде дека тројката направила решавачки придонес во борбата против крвно преносливиот хепатитис.

„За првпат во историјата, хепатит Ц може да се лекува, што ги зголемува надежите дека оваа болест може да се искорени во светот“, соопшти Нобеловиот комитет.