Украина зароби двајца севернокорејски војници во руската област Курск, изјави денеска претседателот Володимир Зеленски, што е првпат Украина да објави живи заробени севернокорејски војници од нивното влегување во војната минатата есен. Севернокорејските редовни трупи влегоа во војната на страна на Русија во октомври, според Киев и неговите западни сојузници, кои првично го проценија нивниот број на 10.000 или повеќе.
Во објава на Икс, Зеленски рече дека војниците биле донесени во Киев и дека комуницираат со Службата за безбедност на Украина (СБУ), домашната разузнавачка агенција на земјата.
„Како и со сите воени затвореници, овие двајца севернокорејски војници ја добиваат потребната медицинска помош“, рече Зеленски. Тој рече дека на новинарите ќе им биде овозможен пристап да разговараат со нив.
Киев вели дека севернокорејските трупи се борат во областа Курск, каде Украина започна упад во август. Киев вели дека сè уште контролира неколку стотици квадратни километри територија таму.
Според Киев и неговите западни сојузници, Пјонгјанг, исто така, ја снабдува Русија со огромно количество артилериски гранати. Русија ниту го потврди ниту демантираше присуството на севернокорејски војници во Курск, а немаше итна реакција од Москва или Пјонгјанг на последниот извештај.
Украина претходно соопшти дека заробила севернокорејски војници во борба, но дека тие биле тешко ранети и умреле набргу потоа.
Зеленски во подоцнежното видео обраќање рече дека војниците биле заробени од специјалните сили на Украина кои работеле заедно со падобранците. Специјалците објавија видео снимено од дрон во кое се тврди дека прикажува дел од операцијата. На него беа прикажани пет мажи во маскирна облека во шумска област, иако е тешко да се распознаат другите детали.
