Преговарачите на американскиот претседател Доналд Трамп за војната во Украина пристигнаа во Москва на разговори со рускиот претседател Владимир Путин, објавија денеска државните медиуми. Новинската агенција ТАСС објави дека специјалниот пратеник на САД, Стив Виткоф, и зетот на Трамп, Џаред Кушнер, слетале на аеродромот „Внуково“. Портпаролот Дмитриј Песков потврди дека Путин денеска ќе ги прими Виткоф и Кушнер. Не е соопштено точното време на средбата во Кремљ. Претходните средби со Путин обично се одржувале доцна навечер.

Украинскиот претседател Володимир Зеленски вчера изјави дека Виткоф и Кушнер потоа ќе го посетат Киев. Се очекува двајцата американски претставници утре да пристигнат во Киев на првата рунда разговори.

Путин нареди тридневна пауза во воздушните напади врз украинскиот главен град Киев поради посетата на американските преговарачи, изјави во денеска Песков, пренесува ТАСС. Прекинот на огнот ќе стапи на сила на почетокот на неделата и ќе трае три дена, рече тој.

Трамп претходно изјави дека преговарачкиот тим ќе донесе предлог насочен кон завршување на војната во Украина, без да даде дополнителни детали.

„Ги испративме таму за да видиме дали можеме да постигнеме нешто“, рече Трамп. Како и при претходните американски напори за посредување, Трамп изрази оптимизам дека може да се постигне напредок, иако досега не е остварен некој поголем пробив.

Зеленски изјави дека Киев ќе дозволи нормално одвивање на сообраќајот во рускиот воздушен простор за време на посетата, како што тоа било случај и при претходните дипломатски посети на американски претставници.

Разговорите за завршување на војната во Украина беа главно во застој во последните месеци, бидејќи Вашингтон го насочи вниманието кон војната со Иран. Двајцата американски пратеници неколку пати ја посетија Москва од 2025 година, но претходно не патувале во Киев како дел од нивните напори за посредување. Вашингтон последен пат посредуваше во директните разговори меѓу Москва и Киев во Швајцарија, во февруари.