Кинеските власти евакуираа повеќе од милион луѓе од нивните домови во источна Кина, вклучувајќи го и Шангај, откако тајфунот Делфин се приближи кон копното. Тој имаше максимална брзина на ветерот од 150 километри на час кога првпат удри во Јухуан, а еден час подоцна го погоди и градот Венжоу, соопштија метеоролошките власти.

Тајфунот го запре транспортот низ регионот, при што 1.400 летови беа откажани само во Шангај.

Бурата се движи кон внатрешноста на Кина, а властите предупредуваат на поројни дождови, силни поплави и ризик од свлечишта до среда. За денеска се прогнозирани обилни дождови во неколку провинции, како и во градот Шангај.

Локалните власти ги повикаа луѓето да избегнуваат активности на отворено, додека неколку туристички атракции остануваат затворени, вклучувајќи делови од Дизниленд и Леголенд. Едно деветгодишно дете се води како исчезнато откако било повлечено во морето, но досега нема потврдени жртви.

Бурата помина долга дистанца од 6.000 километри пред да стигне до копното, што укажува на трипати подолго времетраење од просечен тајфун. Исто така, има огромна циркулација и интензивен капацитет на врнежи од дожд.

Делфин донесе поројни дождови во Филипини, делови од северен Тајван и на јапонскиот остров Окинава, пред да се упати кон Кина.