Петкатна станбена зграда во централниот атински кварт Петралона се урна за време на рушење на соседна зграда, но сите жители успеаја навреме да ги напуштат своите домови и нема пријавено повредени.

Снимките на државната телевизија „ЕРТ“ покажаа куп урнатини каде што некогаш се наоѓаше зградата со седум стана.

Инцидентот се случи додека на соседната парцела се вршеле работи за рушење на двокатна зграда заради изградба на нова зграда. Уривањето било постепено, па три лица кои биле внатре успеале навреме да избегаат. Подоцна било лоцирано и четвртото лице кое во прв момент било пријавено како исчезнато.

На местото на настанот првично биле испратени кучиња трагачи за да ги пребаруваат урнатините, како и осум противпожарни и три амбулантни возила.