Европските претставници се согласиле да ги разгледаат сеопфатните безбедносни аранжмани на континентот со САД, со цел да се минимизираат тензиите помеѓу Русија и сојузниците од НАТО. Ова беше договорено на првиот ден од мировните преговори за Украина, кои се одржуваат во Абу Даби.

Според две речиси идентични изјави, една од американскиот пратеник Стив Виткоф и друга од Европскиот совет, Украина и нејзините европски партнери се согласиле со американската страна дека е од суштинско значење да се разгледаат повоените безбедносни грижи и да се намали ризикот од поширок конфликт.

„Заедничката цел е да се развие практична и заемно зајакнувачка безбедносна рамка, која ќе ја зацврсти долгорочната безбедност на Украина и ќе ја изгради довербата неопходна за постигнување решение преку преговори. Покрај главниот фокус на траен мир, во разговорите беше опфатено и прашањето како да се надградат постојните европски безбедносни институции и договори по завршувањето на војната во Украина“, се наведува во двете изјави.

Прашањето за идната безбедносна архитектура на Европа е исклучително чувствително за европските влади, кои стравуваат дека Доналд Трамп се подготвува драстично да ја намали американската поддршка за безбедноста во Европа.

Ова се први разговори помеѓу Русија, Украина и САД од февруари годинава. Џаред Кушнер и Стив Виткоф, кои ја предводат американската страна, силно се залагаат дискусијата да ја опфати и идната безбедност на Европа и за вклучување на Европа во преговорите, на што Русија досега се противеше.