Организациите за слобода на говорот ја поздравија веста за ослободувањето на основачот на Викиликс Џулијан Асанж од затвор во Британија, но рекоа дека случајот на САД направил лош преседан казнувајќи го толку долго. Асанж утре во судот на пацифичкиот остров Саипан треба да се изјасни за виновен по едно обвинение за кршење на американскиот закон за шпионажа, во договор што ќе му овозможи да се врати дома во Австралија, ставајќи крај на 14-годишната правна одисеја што можеше да го доведе во повеќедецениски затвор.

• АСАНЖ ОДБИЛ ДА ПАТУВА ВО САД, ПА ЌЕ БИДЕ ОСУДЕН НА ПАЦИФИЧКИ ОСТРОВ, ПРЕД ДА СЕ ВРАТИ ВО АВСТРАЛИЈА
• ОСЛОБОДЕН ЏУЛИЈАН АСАНЖ ОТКАКО ПОСТИГНА ДОГОВОР СО АМЕРИКАНСКИТЕ ВЛАСТИ

Американските власти во 2019 го обвинија Асанж за 18 кривични дела за заговор со поранешната американска разузнавачка аналитичарка Челзи Менинг, за да добие доверливи информации и незаконско објавување имиња на доверливи извори. Неколку групи за права, водечки медиумски организации и лидери на земји како Мексико, Бразил и Австралија побараа да се отфрлат обвиненијата против Асанж. Меѓу оние кои го поздравија неговото ослободување беа групата за застапување Комитет за заштита на новинарите (КЗН) и организацијата за слобода на говорот Институтот Најт за Првиот амандман на Универзитетот Колумбија.

„Џулијан Асанж се соочи со кривично гонење што имаше сериозни последици за новинарите и слободата на медиумите ширум светот“, се вели во соопштението на извршната директорка на КЗН Џоди Гинсберг.

Поддржувачите на Асанж велат дека тој е херој кој бил жртва бидејќи ги разоткрил погрешните постапки на САД и наводните воени злосторства, меѓу кои и оние во конфликтите во Авганистан и Ирак. Вашингтон вели дека објавувањето на документите става животи во опасност.

„Иако го поздравуваме крајот на неговиот притвор, гонењето на Асанж од САД постави штетен правен преседан со тоа што го отвори патот за судење на новинарите според Законот за шпионажа ако добијат доверливи материјали од свиркачите. Ова никогаш не требаше да биде случај“, рече Гинсберг.

Слично кажа и Џамеел Џафер, извршен директор на Институтот Најт.

„Договорот за признавање вина би го спречил најлошото сценарио за слободата на медиумите, но овој договор предвидува дека Асанж ќе одлежи пет години затвор за активности со кои новинарите се занимаваат секој ден. Тоа ќе фрли долга сенка врз најважните видови новинарство, не само во оваа земја (САД) туку и низ целиот свет“, рече Џафер.