Украинскиот претседател Володимир Зеленски изјави дека е подготвен да поднесе оставка во замена за прием на Украина во НАТО.

„Ако тоа значи мир за Украина, тогаш јас сум подготвен“, рече Зеленски, нудејќи услови за негова оставка како шеф на државата на денешната прес-конференција во Киев.

Неговиот приоритет е да ја обезбеди безбедноста на Украина, а влезот во НАТО ќе биде најдобрата опција, рече тој, додавајќи дека не сака да владее со децении.

На 24 февруари се одбележува третата годишнина од целосната инвазија на Русија врз нејзиниот сосед. Една од причините за војната што ја најави Русија е да ја спречи Украина да влезе во НАТО.

Неодамна, американскиот претседател Доналд Трамп го нарече Зеленски „диктатор“ и се пожали дека не одржал избори. Мандатот на Зеленски првично требаше да заврши во мај минатата година, но беше продолжен поради тековната вонредна состојба.

Претходно овој месец, американскиот секретар за одбрана Пит Хегсет на состанокот на Контакт групата за одбрана на Украина изјави дека САД не веруваат оти членството на Украина во НАТО е реален исход од преговори за решавање на војната.