Јапонија издаде предупредување за цунами откако земјотрес со јачина од 7,6 степени според Рихтерова скала го погоди централниот дел на земјата. На жителите на крајбрежната област Ното во префектурата Ишикава им е кажано веднаш да се евакуираат на повисоки подрачја.
Државната телевизија „НХК“ објави дека бранови високи до пет метри би можеле да стигнат до Ното. Засега нема информации за штети.
Властите објавија предупредување за цунами и за соседните префектури Ниигата и Тојама, каде што се очекуваат бранови високи до три метри.
Најголемиот државен оператор за нуклеарна енергија „Кансаи електрик“ објави дека не се забележани абнормалности во нуклеарните централи во погодените подрачја.
