Пандемијата на коронавирусот го намалила просечниот животен век во САД за 18 месеци во минатата година, што е најголем годишен пад од Втората светска војна, објави Центарот за контрола и превенција на болести (ЦДЦ).
Просечниот животен век на Американците сега изнесува 77,3 години, додека во 2019 бил 78,8 години. Најголемиот пад на животниот век е забележан кај хиспано популацијата, па следуваат Афроамериканците.
„Падот на просечниот животен век меѓу 2019 и 2020 година во најголем дел може да се припише на пандемијата. Смртните случаи од ковид-19 придонесле за речиси 75% од падот“, се вели во извештајот на ЦДЦ.
Повеќе од 609.000 Американци починале во пандемијата, од кои 375.000 минатата година. Ковид-19 бил третата најчеста причина за смрт во САД минатата година.
„Ваквиот пад буквално значи катастрофа“, изјави Марк Хејворд, професор по социологија на Универзитетот Тексас.
