Луис Хамилтон дојде на чекор до рекордот на Михаел Шумахер откако ја освои шестата титула во Светското првенство во Формула 1.

Британецот стана вториот најуспешен возач на сите времиња откако заврши како втор на трката за Големата награда на САД во Остин, за да го надмине Хуан Мануел Фанџо, кој освои пет титули во 1950-ите. Ален Прост е четврти на вечната листа со четири титули.

„Пресреќен сум, чест ми е што сум во друштвото на така големи имиња“, кажа Хамилтон, по што се осврна на можното израмнување на рекордот на Шумахер.

„Не знам до каде можам да одам, но како возач, сѐ уште се чувствувам многу свежо. Нема да се откажеме“.

Хамилтон ја обезбеди титулата со десет победи во досега извозените 19 извозени трки. На две трки до крајот на сезоната, тој има 67 бодови повеќе од второпласираниот тимски колега од Мерцедес, Валтери Ботас.