Слаѓана Димишкова, Цветин Чилиманов, Горан Трпеновски и Љубомир Костовски се четворицата членови на Привременото ад хок тело за следење на медиумите пред предвремените парламентарни избори кои ги предложија партиите, а ги именуваше Агенцијата за аудио и аудиовизуелни медиумски услуги, соопшти Агенцијата.
Димишкова, претседателка на новинарската асоцијација МАН и помошник главен уредник во „Вест“, и Чилиманов, новинар на државната агенција МИА, се предлози на ВМРО-ДПМНЕ, а Трпеновски, уредник на политичката рубрика во „Вест“,  и Костовски, уредник на онлајн изданието „Глобус”, на СДСМ.
Според Изборниот законик, петтиот член, кој не е по партиски предлог, а треба да биде Албанец, четворицата партиски претставници треба да го договорат, по што директорот на Агенцијата за медиуми ќе го назначи најдоцна 15 дена по нивното именување, односно најдоцна до 23 август.
Најголемата казна за медиумите во периодот пред изборите ќе изнесува 4.000 евра.
ЗНМ веднаш излезе со став дека нема да учествува во ова ад хок тело.