„Врба“, шестиот филм на Милчо Манчевски, ќе игра на филмскиот фестивал во Бенгалуру, Индија (26 февруари до 4 март) во селекцијата со најуспешните филмови на изминатава година, меѓу кои оскаровецот  „Паразит“ на Бонг Јон-Хо, „Болка и слава“ на Педро Алмодовар,  „Офицер и шпион“ на Роман Полански.

„Врба“, кој е најгледаниот филм во Македонија, пролетва ќе игра и на уште четири познати европски и светски фестивали: ФЕСТ во Белград, Синеквест во САД, Фантаспорто во Португалија и Софија, Бугарија.

По светската премиера на „Врба“ на Римскиот филмски фестивал во октомври лани и по македонската премиера и киноприкажување од два и пол месеци со кое ги сруши сите рекорди на гледаност, филмот играше и  на светските фестивали во Тајпеј и Талин.

На престојниот 48. ФЕСТ во Белград (од 28 февруари до 8 март), „Врба“ е во главната селекција за награди, со првата проекција на 2 март, и уште две, на 3 и 4 март.  Од ФЕСТ, „Врба“ оди на 40. издание на Фантаспорто во Порто (од 28 февруари до 8 март), еден од 20-те водечки во светот, каде филмот ќе биде прикажан на 6 март во програмата „Недела на режисери“.

Во март, „Врба“ ќе ја има и американската премиера, во натпреварувачката програма на Синеквест, еден од најстарите и најреномирани фестивали во САД (од 3 до 15 март) во Сан Хозе и Редвуд Сити, Калифорнија.

Исто така во март, „Врба“ ќе биде прикажан и на 24 фестивал во Софија, еден од најголемите во регионот (од 12 до 22 март).

Изминатиов месец „Врба“ имаше премиера и во Нов Зеланд и доби награда за најдобар филм на камерниот фестивал за независни филмови во Велингтон.

Филмот месецов беше прикажан и на два домашни филмски фестивали, „Златна рамка“ и „Фестивал на современи ирански и македонски филмови“.