Коригирана вест: Иако утринава беше објавено дека петнесетгодишно девојче е прва жртва на земјотресот во Загреб, директорот на Детската болница изјавил дека тоа е во критична состојба со тешка церебрална повреда.

Хрватските медиуми претходно објавија дека девојчето загинало кога врз неа паднале делови од покрив на една зграда.

Загреб и северозападниот дел на Хрватска утрово го погодија два земјотреса, при што првиот во 6:24 часот имал јачина од 5,3 степени според Рихтерова скала, а вториот, кој се случи половина час подоцна, бил од пет степени. Во наредните часови се регистрирани уште два поблаги земјотреси.

Во Загреб се оштетени бројни згради и автомобили, а во болниците се примени и десетина, полесно повредени.

„Не влегувајте во куќите, останете надвор“, предупреди шефот на загрепскиот Центар за управување со кризи, Павле Калиниќ.