Европската комисија предложи постепено отворање на границите на Европската Унија во обид да се поттикне туризмот, кој е тешко погоден од пандемијата на коронавирусот.

„Нашата порака е дека ќе имаме туристичка сезона ова лето, макар и со безбедносни мерки и ограничувања“, изјави еврокомесарот за економски прашања Паоло Џентилони.

Австрија и Германија се последните земји од ЕУ кои се согласија да ги укинат ограничувањата при патување. Од петок ќе има рутински контроли на граничните премини, а од 15 јуни ќе може слободно да се патува.

Необврзувачкиот план што Европската комисија ќе им го испрати на сите 27 членки на Унијата предвидува постепено укинување на забраната за патување, а потоа и на граничните контроли. Земјите со слична здравствена ситуација ќе можат да работат заедно на укинувањето на границите и на продолжувањето на одредени ограничувања.

Естонија, Литванија и Летонија од петок ќе се поврзат со „балтички балон“, кој ќе овозможи слободни патувања со железница, брод и авион меѓу овие три земји, без карантин.