По завршување на продолжениот карантински викенд заради заштита од ширење на коронавирусот, ќе се врши интензивна дезинфекција на улиците, јавните површини и станбените објекти на територија на Општина Охрид, кажаа од Општинскиот кризен штаб.

Од Кризнот штаб потврдија дека за време на викендов инспекциските служби казниле станоиздавачи кои ги прекршуваат препораките и уредбите на Владатаза заштита од КОВИД- 19, без да го прецизираат нивниот број.

„Поради зголемениот број на посетители во Охрид, инспекторите на Државниот пазарен инспекторат заедно со екипи на СВР Охрид и претставници на Инспекторатот при Општина Охрид спроведуваат 24-часовни контроли на сместувачките капацитети и се врши санкционирање на оние капацитети и станоиздавачи кои ги прекршуваат препораките и уредбите на Владата на Република Северна Македонија, во делот на туристичката дејност и во насока на превенција од КОВИД-19”, велат од Кризниот штаб.

Викендов во Охрид има околу 5.000 гости, главно од Скопје, Тетово, Куманово, каде е во тек тридневниот полициски час, и од други градови. Сместени се во викенд-станови и во куќи на охриѓани.

Во Охрид, каде полицискиот час викендов е секој ден од 16 до 5 часот, досега има 31 заболен од корнавирус, а вчера беше регистрирани пет новозаболени.

Д. ЧУБРИЌ