Северна Кореја го пријави она што го опиша како прв можен случај на коронавирус во земјата досега. Државната новинска агенција КЦНА објави дека лице кое пред три години пребегнало во Јужна Кореја минатата недела се вратило во земјата со симптоми на ковид-19.

Лидерот Ким Џонг-ун одржал итен состанок со своите најблиски соработници, воведувајќи карантин во пограничниот град Каесонг.

Северна Кореја досега тврдеше дека нема случаи на коронавирус, но аналитичарите сметаат дека тоа е малку веројатно. Таа ги затвори своите граници и стави илјадници луѓе во изолација пред шест месеци.

„Ким нареди максимален вонреден систем за да се скроти вирусот. Тој покрена истрага за да се открие како лицето успеало да ја помине силно утврдената граница, најавувајќи жестоки казни за оние кои направиле пропуст“, објави КЦНА.

Јужна Кореја кажа дека во изминатите денови немало нелегални поминувања на линијата на разграничувањето.