Премиерот Зоран Заев во врска со меморандумот што го испрати Бугарија до земјите членки на ЕУ со кој ги „информира“ дека македонскиот јазик не постои, а македонскиот нарoд е творба на Тито, кажа дека е навреда, но оти тој сепак ќе остане на пријателскиот наратив за отворените прашања со Бугарија.
„Со Република Бугарија сме сојузници во НАТО и наша заедничка обврска е да ја унапредуваме соработката. Правото на самоопределување и на самоидентификација се темелни европски вредности и цивилизациски придобивки. Посебноста на македонскиот јазик и на македонскиот етнички идентитет се неспорен факт. Македонскиот јазик е составен дел од личната карта на Северна Македонија и во Обединетите нации заедно со многуте прифатени и признаени модерни јазици, кои се изучуваат на универзитетите во целиот свет. Тврдењата и изјавите кои содржат навреди, не водат кон вистинско пријателство“, рече Заев, одговарајќи на новинарско прашање на прес-конференција за националната платформа за онлајн учење.
За него пријателството е двонасочна улица, а Договорот за пријателство и добрососедство со Бугарија одлична можност за наоѓање безброј нишки за соработка и заеднички интерес и за да се испочитуваат сите европски и цивилизациски вредности.
Заев најави дека лично ќе внимава на наративот и зборовите во однос на отворените прашања со Бугарија, зашто тврди оти „има решение со кои победник ќе бидат двете страни“.
С. К. ДЕЛЕВСКА
