Унгарија стави вето на буџетот на Европската Унија зашто ќе нѐ принудуваа да примаме мигранти, кажа премиерот Виктор Орбан.

Таа заедно со Полска го блокираше изгласувањето на седумгодишниот буџет од 1.800 милијарди евра, кој вклучува и фонд од 750 милијарди наменет за заздравување од последиците на пандемијата на коронавирусот. Сепак, ЕУ неодамна го услови одобрувањето на фондовите со почитувањето на владеењето на правото.

„Доколку го прифатевме сегашниот предлог, тоа ќе значеше поддржување на имиграцијата и уценување на оние земји кои се противат на имиграцијата“, кажа Орбан.

Тој вели дека Унгарија е посветена на почитувањето на владеењето на правото.

„Оние што ги бранат своите граници и својата земја од мигранти во Брисел веќе не се класифицираат како некои што го почитуваат законот. Ние во јули ги поддржавме и буџетот и фондот за заздравување зашто сме посветени на европската солидарност“, кажа Орбан.