Норвешката нискобуџетна авиокомпанија „Норвиџан“ го рекламира летот за Лос Анџелес, САД со слоганот „Бред е ерген“. Овие реклами за новиот лет од Лондон за Лос Анџелес се објавени во печатени медиуми, а доаѓаат по веста дека се разведува најславната холивудска двојка Бред Пит и Анџелина Џоли.

„Норвиџан“ неколку години по ред е прогласена за најдобра нискобуџетна компанија во Европа, а од 2013 има и прекуокеански летови на дестинации од различни градови во Европа до различни градови до САД.

Бред Пит на аеродромот во Лос Анџелес снимен во мај, 2015 (Фото: Дејли мејл)

Анџелина Џоли во понеделникот поднесе барање за развод поради „непомирливи разлики“од Пит, со кого се во брак 2 години по 12-годишна врска и имаат 6 деца, поради. Пит изјави за магазинот „Пипл“ дека е „многу тажен“ што му завршил бракот и рече дека „она што е најважно е доброто на нашите деца“. Според бракоразводното барање, Џоли бара старателство над нивните 6 деца и бара судот на Пит да му додели право на посета. Нејзиниот адвокат рече дека одлуката е донесена „за добро на семејството“.

Американските медиуми објавија дека Пит е под истрага за вербално и физичко малтретирање на децата. Инцидентот наводно се случил додека семејството летало со нивниот приватен авион, кога напиениот Пит му се нафрлил на едно од децата, го пцуел и го зграпчил за лицето. Џоли и некои од другите деца биле присутни кога тоа се случило. Барањето за развод Џоли го поднела следниот ден.