Над 12.000 посетители викендов биле во скопската Зоолошка градина. Директорот на Зоолошката Ѓорѓи Галетановски вели дека оваа е рекордна бројка за месец февруари во споредба со минатите години.

„Покрај домашните гости, викендов имаше голем број посетители и од соседството. Во градината се почитуваат протоколите за ковид-19 и не е дозволен влез без маски. Очекувам пролетва со отворањето на Дино паркот во еден викенд да имаме нов рекорд од 20.000 посетители“, вели Галетановски.

Дино паркот ќе се отвори за посетители за петнаесетина дена. Галетановски вели дека во моментов просторот хортукултурно се уредува и штом екипите на ЈП „Паркови и зеленило“ завршат со садење зеленило и дрвца, посетителите ќе можат да ги видат диносаурусите.

Во паркот ќе има 41 модел на диносаурус во природна големина, со можност за синхронизирани движења и испуштање звуци. Ќе се плаќа посебна карта која ќе чини 50 денари.

А. АНТЕВСКА