Словачкиот премиер Игор Матович изненадувачки соопшти дека поднесува оставка и дека ќе си ги сменат местата со министерот за финансии Едуард Хегер, ставајќи крај на владината криза во Словачка. Промената на чело на словачката влада доаѓа по консултациите на лидерите на три од четирите партии во владејачката коалиција.

Хегер, кој е член на партијата на Матович ОЛАНО, сè уште нема поддршка од партијата САС, но останатите три партии имаат тенко мнозинство во парламентот и без САС. Владејачката коалиција западна во сериозна криза поради конфликтот околу справувањето со пандемијата на коронавирус. Шест од 16-те министри во владата поднесоа оставки изминативе денови.

Партиите САС и За луѓето го обвинуваат Матович за високиот број починати од ковид-19, а му замеруваат и што нарача руски вакцини „Спутник“, наспроти одлуката на својата влада, и лично ги пречека на аеродром.

Минатата недела, Матович понуди да поднесе оставка под услов сите негови критичари да си заминат од владата.