Денеска на Плоштадот Македонија во Скопје не дојде Дедо Мраз, за првпат откако Град Скопје организира новогодишни прослави. Досега, Дедо Мраз кој трационално пристигнуваше на Плоштадот, делејќи им подароци на децата.

Град Скопје не организираше ниту програма за деца. Бината и Плоштадот се празни, немаше детски џагор. Денеска не се слушаа детски песни, не се одржуваше новогодишна детска претстава, намеше маскоти и други забавни точки кои со години ги имало за радост на најмладите жителите на градот. Единствен Дедо Мраз беше од приватното фото студио кое има поставено штанд за сликање. Не работат ниту сите штандови од „Винтерленд“, а дури денеска е наместена бината на која вечер за дочекот ќе настапат домашни пејачи и групи.

„Главен град на држава без Дедо Мраз за да се израдуваат децата, срамота. Иако нигде не беше најавено дека ќе има програма за пристигнување на Дедо Мраз, сепак дојдовме на Плоштадот затоа што секоја година во 12 часот доаѓа Дедо Мраз и тоа е радост за децата. Не ни помисливме дека е можно да нема детска програма. Но, еве на Плоштад сме, а Дедо Мраз го нема“, вели Д. М. од Скопје која се јави во нашата редакција.

Од кабинетот на градоначалничката Данела Арсовска само ни одговорија дека годинава Дедо Мраз нема да дојде на Плоштадот, но до објавување на текстот не образложија зошто во програмата за „Винтерленд“ за која се потрошени 32.000 евра не се предвидело и доаѓање на Дедо Мраз и детска програма .

А. АНТЕВСКА