Излезните анкети и првичните неофицијални резултати сугерираат дека опозициската либерална партија Движење Слобода на Роберт Голоб победи убедливо на парламентарните избори во Словенија, нанесувајќи му тежок пораз на популистичкиот премиер Јанез Јанша.

Според излезната анкета објавена од државната телевизија, Движењето Слобода освои 35,8 отсто од гласовите, споредено со 22,5 отсто на владејачката СДС. Зад двете најголеми партии се Нова Словенија со 6,8 отсто, следени од Социјалдемократите со 6,6 отсто и Левица со 4,4 отсто.

Ако се потврдат овие резултати, Движењето Слобода, која е нова партија на изборите, изгледа ќе формира влада со двете помали централно-левичарски партии, Социјалдемократите и Левица.

„Вечерва луѓето танцуваат. Утре е нов ден и нè чека сериозна работа“, изјави Голоб пред своите симпатизери во партиското седиште.