Францускиот претседател Емануел Макрон рече дека е од витално значење Русија да не биде понижена за да може да се најде дипломатско решение кога ќе престанат борбите во Украина, додавајќи дека верува оти Париз ќе има посредничка улога за ставање крај на конфликтот. Макрон се обидува да одржи дијалог со рускиот претседател Владимир Путин по инвазијата на Москва врз Украина во февруари. Неговиот став беше постојано критикуван од некои источни и балтички партнери во Европа, бидејќи тие го сметаат за поткопување на напорите за притисок врз Путин на преговарачката маса.

„Не смееме да ја понижуваме Русија, за да можеме на денот кога ќе престанат борбите да изградиме излезна рампа преку дипломатски средства“, рече Макрон. „Убеден сум дека улогата на Франција е да биде посредничка сила“.

Макрон редовно разговара со Путин од почетокот на инвазијата, како дел од напорите да се постигне прекин на огнот и да започне веродостојни преговори меѓу Киев и Москва.

„Мислам, и му кажав, дека тој прави историска и фундаментална грешка за својот народ, за себе и за историјата“, рече Макрон.

Франција воено и финансиски ја поддржува Украина, но Макрон досега не бил во Киев за да понуди симболична политичка поддршка како другите лидери на ЕУ, а Украина тоа го очекува од него. Макрон рече дека не ја отфрлил можноста да оди.

Париз испраќа офанзивно оружје, вклучително и хаубица „цезар“, земен од резервите на француската армија. Макрон рече дека побарал од производителите на оружје да го забрзаат производството.