Бројот на загинати од вчерашниот руски ракетен напад врз станбена зграда во југоисточниот украински град Днепар денеска се искачи на 29, објави регионалниот гувернер додека спасувачките екипи се обидуваат да извлечат преживеани од урнатините. Екипите за итни случаи работеа низ студената ноќ во уништената повеќекатна станбена зграда, местото на најголемите жртви од широкиот руски баражен напад. Бројот на загинати во Днепар е најмногу убиени цивили на едно место од нападот на 30 септември во областа Запорожје во Украина.

Русија вчера ги нападна и главниот град Киев и североисточниот град Харкив, ставајќи крај на двонеделното затишје во воздушните напади што ги започна против енергетската инфраструктура на Украина и урбаните центри речиси неделно од октомври. Русија денеска ги призна ракетните напади, но не ја спомна станбената зграда во Днепар. Русија во неколку наврати негираше дека цели на цивили во војната.

Русија вчера истрела 33 крстаречки проектили, од кои 21 беа соборени, изјави генералот Валериј Залужни, врховен командант на украинските вооружени сили. Ракетата што ја погоди станбената зграда е Кх-22 проектил лансиран од руската област Курск, според командата на воените воздухопловни сили, која рече дека Украина нема систем способен да пресретне таков тип оружје.

Во Днепар работниците користеле кран за да ги спасат луѓето заробени на горните катови од станбениот блок каде што живеат околу 1.700 жители. Некои жители сигнализираа за помош со светлата на нивните мобилни телефони. Претседателот Володимир Зеленски објави дека најмалку 73 лица се ранети, а 39 лица се спасени до денеска попладне. Градската влада во Днепар соопшти дека 43 лица се пријавени за исчезнати.