Пакистан кажа дека две деца загинале во ракетен напад извршен од соседниот Иран и предупреди дека тоа би можело да води кон сериозни последици. Иран соопшти дека мета на нападот биле две бази поврзани со милитантната група Џаиш ал-Адл.

По Ирак и Сирија, Пакистан е третата држава која Иран ја ракетираше во изминатите два дена. Пакистан ги отфрли наводите на Иран и го опиша нападот како незаконски чин.

Ракетен напад на Иран врз Пакистан е речиси без преседан. Во нападот било погодено село во југозападната провинција Балокистан, која граничи со Иран. Пакистанското министерство за надворешни работи силно го осуди „неиспровоцираното нарушување на пакистанскиот воздушен простор од страна на Иран“.

„Инцидентот е целосно неприфатлив, а уште позагрижувачки е што се случи иако постојат неколку канали на комуникација помеѓу двете земји“, кажаа од министерството.

Џаиш ал-Адл е најактивната и највлијателна сунитска милитантна група која дејствува во регионот на Балокистан.