Градоначалникот на гратчето Белкастро  во јужна Италија издаде необична наредба: „Да се ​​разболуваш е забрането“. На жителите на Белкастро во јужниот регион на Калабрија им е „наредено да избегнуваат зараза со каква било болест за која е потребна медицинска помош, особено брза помош“, се вели во декретот на градоначалникот Антонио Торчија.

Торчија за локалната телевизија изјави дека иако „го прифаќаме (декретот) со малку иронија“, тој има за цел да го истакне несоодветниот пристап на градот до здравствената заштита. Белкастро, гратче со околу 1.300 жители, од кои половината се постари, има здравствен центар кој е често затворен, а лекарите на повик не се достапни за време на викендите, празниците или по работното време, рече градоначалникот.

Затворањето на блиските здравствени центри и фактот дека дежурната служба е на околу 45 километри во градот Катанзаро, го наведоа градоначалникот да верува дека е неопходно „да донесе итен и неодложен акт на претпазливост“, рече тој.

„Ова не е само провокација, уредбата е крик за помош, начин да се насочи центарот на вниманието“, рече Торчија.

Во својот указ, градоначалникот побара од луѓето „да не се впуштаат во контакти што можат да бидат штетни и да избегнуваат домашни несреќи“, и „да не излегуваат од дома премногу често, да патуваат или спортуваат и поголемиот дел од времето да се одмораат“.  Не е јасно дали, или како, уредбата ќе се спроведе.

Градоначалникот рече дека наредбата има за цел да ги испровоцира регионалните власти и здравствените власти да ги решат проблемите. Уредбата ќе остане во сила додека Центарот за јавно здравје во градот не биде редовно отворен, рече градоначалникот.

„Дојдете и живејте една недела во нашето мало село и обидете се да се чувствувате безбедно, знаејќи дека во случај на вонредна здравствена состојба единствената надеж е да стигнете до градот Катанзаро навреме, а тој е оддалечен 45 километри“, вели тој.

Ретко населениот регион Калабрија е еден од најсиромашните во Италија и многу млади луѓе се иселуваат од руралните заедници за да живеат во градовите. Над 75% од градовите во Калабрија – приближно 320, имаа помалку од 5.000 жители во 2021, што предизвикува стравувања дека некои заедници би можеле целосно да изумрат. Некои градови дури почнаа да нудат да им платат на луѓето да живеат таму во обид да го спречат падот на населението.

Градоначалникот на Белкастро знае дека многу од градовите се соочуваат со слични проблеми со пристапот до здравствена заштита.

„Јас сум капка во океанот“, изјави Торчија. „Провинцијата Катанзаро има 80 општини и верувам дека повеќето од нив страдаат од истите проблеми“.