Со 3-минутен молк за трите девојки кои досега се прегазени на булеварот Партизански одреди во Скопје, денеска почна граѓанскиот протест на местото каде пред два дена загина 22-годишната Фросина Кулакова. Ја прегази дваесетгодишниот Васил Јованов од Скопје, кој возел пијан, без возачка дозвола и минал на црвено светло со 120 км на час, додека таа минувала на пешачки премин.
На протестот, каде поголем дел беа млади и студенти, граѓаните извикуваа „Сакаме правда!“ и рекоа дека вакви работи ќе ни се случуваат и понатаму ако се молчи.
„Уште многу вака ќе треба да молчиме, ако сега не го кренеме гласот. Фросина може да биде секој од нас. Фросина е жртва на системот, жртва затоа што во државата не постои казнивост“, рече претставник на Студенскиот сојуз кој говореше на протестот.
Граѓаните продолжија да маршираат кон Собранието, а потоа кон Обвинителството и Кривичниот суд. Пред Собранието беше скандирано „Бараме решенија и одговорност“ и беше кажано дека не може една година на улиците да има камери ама тие да не функционораат, бидејќи не се носат законските измени.
Пред Обвинителството се извикуваше „Сакаме промени“, „Сакаме правда“, „Убијци“, „Нема правда, нема мир“. Пред Судот извикуваа „Затвор за Васил“, „Нема оправдување“.
Студентите најавија нови протести.
Јованов, кој вчера доби притвор од 30 дена од судија на претходна постапка, кога имал 16 години во 2022 удрил жена со кола. Удрената жена била со полесни повреди и се откажала од кривично гонење, иако МВР тогаш му поднело пријава на детето возач. Лани, за делото поседување и продажба на дрога судија од Кривичниот суд лани место да го осуди на затворска казна, го пуштил со воспитна мерка, иако кога бил фатен Јованов имал 19 години и бил полнолетен, а веќе го имало и во евиденцијата на истражните органи дека на 16 години удрил со кола во жена и ја повредил.
- 20-ГОДИШНИКОТ КОЈ ПИЈАН И БЕЗ ДОЗВОЛА ПРЕГАЗИ ДЕВОЈКА, НА 16 ГОДИНИ УДРИЛ ЖЕНА СО КОЛА, А СУДИЈА МУ ДАЛ САМО ВОСПИТНА МЕРКА КОГА БИЛ ФАТЕН СО ДРОГА
- СУДОТ НЕ ВИ Е КРИВ ЗА ЦРНИТЕ СООБРАЌАЈНИ ТОЧКИ НА КОИ ГАСНАТ ЖИВОТИ И НЕ МОЖЕ СУДИЈА ДА ПРЕТПОСТАВУВА ДЕКА ОБВИНЕТИОТ ЌЕ ИЗВРШИ ДРУГО ДЕЛО, ВЕЛАТ ОД КРИВИЧНИОТ СУД
- ВО ДОСИЕТО НА 20-ГОДИШНИОТ ЈОВАНОВ КОЈ ЈА ПРЕГАЗИ ФРОСИНА НЕ ПОСТОИ НИ ПРЕКРШОЧНА ПРИЈАВА ОД МВР ЗА ТОА ШТО НА 16 ГОДИНИ ВОЗЕЛ И ПОВРЕДИЛ ЖЕНА
- СТУДЕНТИТЕ ПРЕД КРИВИЧЕН СУД ПОБАРАА ЗАТВОРСКА КАЗНА ЗА 20-ГОДИШНИКОТ КОЈ ЈА ПРЕГАЗИ ФРОСИНА И НАЈАВИЈА НОВИ ПОМАСОВНИ ПРОТЕСТИ
А. АНТЕВСКА
