Откако не ги добија декемвриската плата и К-15 за лани, протестираа вработените во велешка „Колска“. Објаснуваат дека трпеливо чекале две седмици да добијат плата и регрес за годишен одмор, но пари немало, а не им се платени ниту придонесите за здравствено. Во фабриката работат 50-ина работници.

„Денеска протестот ќе биде во кругот на фабриката, а доколку не ги добиеме парите до петок или понеделник наутро, ќе го блокираме железничкиот сообраќај на станицата во Велес. Владата им нудеше на вработените и на тогашната управителка да потпишат план за реорганизација. Не прифативме, таа даде оставка, па беше именуван нов управник“, рече Тони Арсовски, претседател на синдикатот во „Колска“.

Вработените испратиле писмо до Владата и Министерството за транспорт и врски со прашање како ќе добиват плата во периодот додека трае реорганизацијата. Одговор досега не добиле. Со договорот потпишан со МЖ „Транспорт“ треба да поправат шест вагони во период од три месеци, а парите што ги добивале за оваа услуга работниците велат биле доволни за една плата, не за три.

„Се лажат ако некој смета дека ќе ја распродава ‘Колска‘ на кој било начин и луѓето ќе бидат без плата, со надеж дека новиот газда, кој ќе ја купи за малку пари, ќе треба со години потоа да ги плаќа заостанатите плати. Ваквиот однос кон вработените кои ја одржуваат железницата во Македонија е неприфатлив. Колегите покажаа дека се истрајни и непоколебливи во борбата за нивните права, очекувам дека тоа ќе го покажат и во овој случај“, кажа Слободан Трендафилов, претседател на ССМ.

Вработените во „Колска“ раскажаа случај со колективното осигурување, што го плаќале со години. Кога нивни колега по повреда побарал да добие осигурување, од компанијата му рекле дека одамна не добивале пари за таа намена од „Колска“. За случајот била известена финансовата полиција.

На 19 март во Велешкиот суд е закажано стечајно рочиште со план за реорганизација на „Колска“, со кој фирма од струмичко Босилево треба да ја преземе фабриката со вработените и долговите. Најголеми доверители се УЈП и ЈКП „Дервен“ од Велес.

Фабриката за шински возила „Велес“ е меѓу најстарите на Балканот, изградена во 1916 од Германците во периодот на Првата светска војна. Во тоа време била работилница, ја изградиле за нивни потреби, за поправка на возовите кои сообраќале кон Солун и Лерин. Таа денес ги поправа товарните и патничките вагони на „Македонски железници“, но и на приватни компании.

П. ПЕЧКОВ