Нема абер да продолжи реконструкцијата на Универзална сала која се запали лани во април, а која треба да е еден од носителите на проектот Скопје – Европска престолнина на културата 2028. Министерството за култура доправа ќе прави нови испитување на констукцијата на опожарениот објект, иако направи експретиза приватниот Институт за сеизмички отпорни градби и климатски промени на Михаил Гаревски, ангажиран од фирмата изведувач „Универзал-Балкан“. Тогаш Гаревски кажа конструкцијата не е оштетена, но сепак, заедно со изведувачот на градежните работи договорено е да се заменат елементите кои се набабрени и да се направи зајакнување на прстенот.
„Надлежните во Министерството за култура и туризам се во комуникација со надлежните во Градот Скопје и во Општина Центар во врска со активностите околу објектот на Универзалната сала. Информираме дека Владата има донесено заклучок со кој се предвидени задолженија и активности за спроведувањена постапки за отстранување на недостатоците и пропустите утврдени во постапката за преземање на реконструкцијата. Во однос на градбата, ве информираме дека во тек е постапка за ангажирање на субјект за испитување на конструкцијата после опожарувањето на објектот, што е неопходно за продолжување со градбата“, ни одговорија од Министерството за култура и туризам.
- ГОРИ УНИВЕРЗАЛНА САЛА ВО СКОПЈЕ
- НЕМА ОШТЕТУВАЊА ОД ПОЖАРОТ НА МЕТАЛНАТА КОНСТРУКЦИЈА НА УНИВЕРЗАЛНА САЛА, НО СЕПАК ЌЕ СЕ СМЕНАТ 6 ЕЛЕМЕНТИ КОИ СЕ НАБАБРЕНИ, ВЕЛИ ГАРЕВСКИ
На нашето прашање зошто се прават нови испитувања и дали имаат сомнежи во оние кои ги направи институтот на Гаревски, ни рекоа дека тоа го прават заради сигурност и безбедност при продолжување на градежните активности, вклучително и за идните посетители на објектот.
„Преземаме мерки за да извршиме увид во состојбата со челичната конструкција пред отпочнувањето на изградбата на објектот на Универзална сала. Впрочем, една од препораките на работната група беше и испитување на конструкцијата пред да се продолжи со реконструкцијата. Министерството за култура и туризам заедно со останатите надлежни институции ги финализира постапките кои се предуслов за продолжување на реконструкцијата. Во најскоро време очекуваме истите и целосно да бидат завршени“, додаваат од Министерството.
Универзална сала се запали на 9 април лани, само еден месец откако продолжија градежните работи за нејзина реконструкција. Почна да се реновира кон крајот на мандатот на ексградоначалникот Петре Шилегов во 2021. Со доаѓањето на градоначалничката функција на Данела Арсовска работите беа стопирани и две години ништо не се работеше. Потоа со одлука на Владата, Министерството за култура ја презема Универзалана сала додека министерка беше Бисера Костадиновска-Стојчевска и се продолжи со реконструкцијата која беше стопирана поради пожарот.
Со доаѓањето на власт на ВМРО-ДПМНЕ, министерот Зоран Љутков кажа дека Универзална сала била незаконски преземена од Град Скопје и оти со реконструкцијата ќе се продолжи кога ќе се надминат сите пречки.
Костадиновска-Стојчевска во октомври лани доби кривична пријава оти не распишала нов тендер за изградба на концертната сала. Пријавата е за сторено кривично дело Злоупотреба на службена положба и овластување од член 353 став 4 во врска со став 1 од Кривичниот законик, поради тоа што не спровела нова јавна набавка за реконструкција на Универзалната сала, туку ги презела обврските што ги имал Град Скопје пред преземањето од Владата. Пријавата до Основното јавно обвинителство Скопје ја поднесе Одделот за криминалистичка полиција, Сектор за економски криминал и корупција во координација со Одделот за сузбивање на организиран и сериозен криминал, Сектор за криминалистички истраги и Единицата за финансиски криминал.
А. АНТЕВСКА
