По апсењето на член на обезбедувањето на премиерот Христијан Мицкоски, осомничен за кривичното дело Оддавање службена тајна, од опозициската СДСМ прашаа „кој му ги дал службените тајни на обезбедувачот на Мицкоски“. Според СДСМ, станува збор за личниот избор на Мицкоски за обезбедување, Ангел Самараков, кој бил фатен како оддава службени тајни на лица од Грчец.
„Пред само неколку месеци, шефот на неговото обезбедување претепа полициски службеници и спречи полициска акција за сузбивање на дрога — настан што и тогаш МВР се обидуваше да го прикрие. Вчера, неговиот личен избор за обезбедување, Ангел Самараков, беше фатен како оддава службени тајни на лица од Грчец. МВР цел ден се обидуваше да го скрие скандалот, но под притисок на медиумите кои ја дознаа вистината, беше принудено да излезе со информација во јавноста“, велат од СДСМ за случајот.
Од владејачката ВМРО-ДПМНЕ одговорија со контрапрашање за СДСМ.
„Нема милост за криминогените, дали бил член на СДС, член на ВМРО-ДПМНЕ или обезбедување на премиерот. Законот за сите подеднакво ќе важи. Кога последен пат бил уапсен член на обезбедување на премиер?“, одговорија од ВМРО-ДПМНЕ.
Вчера, од МВР соопштија дека била спроведена координирана полициска акција и реализирани се истражни дејствија за претрес на дом, возила и лица на подрачјето на СВР Велес, по претходно добиени сознанија за сторено кривично дело Оддавање службена тајна.
„При спроведувањето на полициската акција и преземените мерки и активности, на паркинг просторот пред хотел во Велес, во возило БМВ затекнати се А.С., полициски службеник во Одделот за заштита на определени личности и објекти и Б.К., а при извршен претрес во возилото пронајден е ранец со службени материјали од МВР и од лицата се одземени мобилни телефони, по што се лишени од слобода. Во рамки на акцијата, дополнително се извршени претреси на повеќе локации, при што се пронајдени и одземени електронски уреди, службени документи и други предмети релевантни за истрагата“, велат од МВР.
Дополнително, оттаму велат дека полицискиот службеник постапувал спротивно на законските и подзаконските акти на Министерството за внатрешни работи, со што истиот неовластено поседувал службени материјали, нивно откривање на трети лица надвор од министерството, а со кои дејствија го извршил кривичното дело .
Од МВР рекоа дека до ОЈО ГОКК ќе биде поднесена кривична пријава против А. С., за кривично дело Оддавање службена тајна по член 360 од Кривичниот законик. Денеска му беше одреден 30-дневен притвор.
