Општинскиот Совет на Штип ги одобри барањата на пет основни и четири средни училишта за корекции во структурата на паралеките што досега ја имаа во претходната учебна година. За новата 2025/2026 година, сите поднесоа барања за добивање согласност за комбинирани и паралелки со помал број ученици.

Раководителката на Секторот за јавни служби, образование и локален економски развој, Снежана Санева, вели дека Советот даде согласност на сите поднесени барања поради очигледниот одлив на ученици генерално во сите основни и средни училишта, па така вкупно во прво одделение се запишале 360 првачиња што е за 35 ученици помалку од лани, бројка која се повторува во последните неколку години.

Дадена е согласност ОУ„Димитар Влахов“ да има две паралелки за прво одделение, но и за погорните одделенија, 2 за петто, 1 за шесто, 3 со осмо и 2 за деветто одделение. Во ОУ„Славејко Арсов“ во населбата Баби ќе има 3 паралелки во прво, 3 во второ, 1 во четврто одделение, 2 во петто, 3 во шесто, 1 во седмо и по две паралелки за осмо и деветто одделение. Слични се барањата и во останатите основни училишта, додека ОУ „Ванчо Прќе“ доби согласност за формирање комбинирани паралелки. Барања за комбинирани и паралелки со помал број ученици имаа и средните училишта кои исто така добија согласност.

Советниците од опозицијата на паузата од седницата на Советот критикуваа дека пред новата учебна година нема мерки за подобрување на условите за работа во училиштата, но има предизборно вработување нов кадар.

Од Општината тврдат дека сите училишта, и основни и средни, се реновирани и подготвени ги очекуваат учениците. Велат дека за нив сега приоритет им е збогатувањето на јавниот автобуски превоз кој се однесува и за учениците, не само за граѓаните. Од први септември ќе се воведе уште една ученичка автобуска линија од ОУ„Гоце Делчев“ до селото Шашаварлија.

Т. ЈОВАНОВСКИ