Украина и нејзините сојузници ќе почекаат до 1 септември за да видат дали Русија е спремна да прифати билатерална средба за крај на инвазијата, изјави Володимир Зеленски. Тој додаде дека очекува одговор од партнерите доколку Русија не го испочитува овој краен рок.

„Ние веруваме дека Владимир Путин сака да ја продолжи војната“, рече Зеленски, додавајќи дека Русија има доведено околу 100.000 војници во околината на источното упориште Покровск со цел да почне нова офанзива.

Тој ги повика европските лидери да дадат јасна дефиниција на безбедносните гаранции за Украина како дел од планот да се заврши три и полгодишната војна.

„Сакаме правно обврзувачки гаранции. Сакаме сојузниците да ги ратифицираат тие гаранции во своите национални парламенти. И кога зборуваме за безбедносни гаранции, ни требаат јасни одговори кој ќе ни помогне да се браниме на копно, во воздух и на море ако Русија повторно нападне и како точно можете да учествувате. Ве молам да ја дефинирате вашата улога. Важно е претседателот Трамп да види дека ние во Европа сме обединети во нашата решеност да ја завршиме војната“, кажа Зеленски.

Емануел Макрон кажа дека Путин ќе го изигра Доналд Трамо ако одбие да се сретне со Зеленски.

„Праведен и траен мир е можен само ако Украина добие силни безбедносни гаранции. Се надеваме дека Путин ќе прифати билатерална или трилатерална средба за завршување на војната, како што е договорено во разговорите со Трамп. Но, ако Путин не го испочитува рокот в понеделник, тој ќе го изигра Трамп, што не може да остане без одговор“, кажа Макрон по средбата со Фридрих Мерц.